बेनी देखी भारतको दिल्लीसम्म सिधा बस संचालन

बेनी, माघ-२१, म्याग्दीको सदरमुकाम बेनीबाट छिमेकी मुलुक भारतको राजधानी नयाँ दिल्लीसम्मका लागि सिधै बस सेवा सुरु भएको छ । बेनी नगरपालिका–८, कालिपुल बसपार्कमा आयोजित एक विशेष कार्यक्रमका बिच नगरप्रमुख सुरत केसीले बुधबार यो सेवाको उद्घाटन गर्नुभयो ।

मोडर्न इरा टुर्स एन्ड ट्राभल्स र सृष्टि यातायात प्रालिको सहकार्यमा सञ्चालनमा आएको यो बस सेवाले म्याग्दीको धार्मिक तथा पर्यटकीय क्षेत्रको विकासमा महत्वपूर्ण योगदान पुर्‍याउने विश्वास गरिएको छ ।

बस सेवा उद्घाटन गर्दै नगरप्रमुख केसीले भन्नुभयो: “गलेश्वरधाम र मुस्ताङको मुक्तिनाथ मन्दिर दर्शनका लागि आउने भारतीय पर्यटकहरूलाई यो सेवाले ठुलो राहत पुग्नेछ । हामी यसको थप प्रचारप्रसारमा समेत ध्यान दिनेछौँ ।”

यो बस हरेक दिन बिहान पौने सात बजे बेनीबाट छुट्नेछ र स्याङ्जा, वालिङ, भैरहवा हुँदै भारतका अयोध्या र आग्रा भएर २७ घण्टामा नयाँ दिल्ली पुग्नेछ । बेनीबाट दिल्लीसम्मको भाडा प्रतिव्यक्ति ५ हजार ४ सय रुपैयाँ र दिल्लीबाट बेनीका लागि ३ हजार २ सय भारतीय रुपैयाँ तोकिएको छ ।

यसअघि म्याग्दीबाट भारत जान पोखरा पुग्नुपर्ने बाध्यता रहेकामा अब सिधै सेवा सुरु भएपछि रोजगारी, उपचार र शिक्षाका लागि भारत जानेहरूलाई सस्तो र सुरक्षित यात्राको सुविधा मिलेको छ । म्याग्दीबाट दिल्ली जाने पहिलो यात्रु उमेश किसानलाई अबका हरेक यात्रामा २० प्रतिशत छुटको सुविधा समेत प्रदान गरिएको छ ।

यात्राका क्रममा यात्रुहरूले आफ्नो परिचय खुल्ने कागजात अनिवार्य साथमा राख्नुपर्ने हुन्छ ।

प्रतिक्रिया दिनुहोस: